Fasnacht 2026
Bi de Affe het dr Zolli Nochwuchs könne verbueche
Villi hän das härzig Tierli grad sofort welle bsueche
Dr Ludovic Magnin isch sie Götti - doch so näbebii
Könnti dä vom Usseh här au grad dr Babbe si
Dr Macron wott bewiise, ass sy Frau au wybligg isch
Drum leggt är vor em Gricht grad d Faggte uf e Disch
Är heigi sii unglaubligg gärn und findi sii so nätt
Und s wär ihm wirkligg ganz egal falls sii die grössere Ei- Eigeheite hät
Im Jura het me uns 3 nit in d Badi yyne gloo
Dr Gilbert sigg e Pöbler und e z grosses Risiko
Er heig e Waffe in dr Hose – do hän mir zünftig afo lache
Wiä ka me so e Ufstand wäg däm Säbeli go mache
E Basler Politiker het grausam reklamiert
Är het dr Strahl vo de Trinkwasserbrünne kritisiert
Dä sprützi in diä falschi Richtig und duet sich nit bewääre
Liebi Männer das mit däm Strahl probiert me euch scho lang z erklääre
Dr glaini Kevin goot zum erschte Mol in e Bordell
Was är für si Batze griegt froogt är s Mademoiselle
Sie schiggt en wieder uuse: “Bueb, gang du ab uf d Pischte!
Früehfranzösisch hämmer ebe nümmi uf dr Lischte!”
Mit Laubbleeser dörf me z Ziiri- sie jetzt mien sie loose
S Laub nümi vom ainte Egge in andere iine bloose
S Gschrei isch gross, denn wieder glai, schliessligg ischs verpufft
Und aimol mee goots bi de Ziircher nur um warmi Luft
Dr Parmelin het Biecher gwälzt, Fachliteratur studiert
So hän sini Zollverhandlige doch no funktioniert
Er heig drum vor em Dräffe mit däm Trump-el-wääse
Jewiils däägligg 2-3 Globibiecher glääse
Die Ambience an dr Fraue EM het uns super gfalle
Fraue gäge Fraue kämpfe um dä Balle
S liggt au niemmer ab wäg eme glaine bitzeli Weh
Und so vill Rossschwänz hämmer bi de Männer no nie gseh
D Kisscam die het 2 verwitscht, wo nit hätte dörfe schmuuse
Kameras sind überall, do kunnt dr Sittesprung schnäll uuse
Z Amerika het me Affäre friehner nit so schnäll entdeggt
Diä hän sich wiä bim Clinton halt no unterem Tisch versteggt
Das mit de Bliemli und de Bienli isch nümmi so modärn
Hüt hän au Bienli Bienli und Bliemli Bliemli und Bienli Pilzli und Bliemli Fischli und Fischli Pilzli so wiä au Bienli gärn
S git Bliemli diä wänn Pilzli si und s Bienli fühlt sich neu als Brot
Kei Wunder dass es so schlächt um d Geburteraate stoht