Fasnacht 2022
E 13- jöörigs Büebli goht do z Basel in e Puff
Stramm lauft är dört iine und isch scho freudig druff
Wo är denn d Hösli abelot fot d Dame afo lache:
«Jä mit dem Stäbli kani höggschtens e Coronateschtli mache.»
E dütschi Rittere sorgt für e olympische Skandal
Schlot uf ihres Rössli i, so richtig grob brutal
E mängem Koch düen bi däm Aabligg d Drääne aabetropfe
E Schnitzel duet me doch erscht noch em Schlachte richtig
klopfe
Dr Vincenz isch scho lang nüm dr tolli Herr Raiffiise
Im Momänt do will är sini Unschuld go bewiise
Zurzyt schafft är als Pöschtler- jo das isch kei Witz
So ka är jetzt fascht dääglig legal vo Schlitz zu Schlitz
Bim Träffe vo dä Bundesrööt, dä Januar ischs gsi
Luege diä fascht alli zimmlig zfriede dri
Plötzlich seit dr Parmelin mit eme lute Lache:
«Dr Berset isch dr Erscht vo uns, wo für si Lohn öbbis muess mache.»
D Laag isch zimmlig ärnscht, d Spitäler diä sin voll
Au über d Triage dänggt me noch, das findet keine toll
D Schwoobe müen kei Angscht ha, dass ihne das passiert
Sie hän ihres Bett scho mit em Badtuech reserviert
D Primateinitiative möcht d Grundrächt au für Affe
So het me e fairi Basis für diä Tierli welle schaffe
Dr Grossroot isch drgäge, mir könne das verschtoh
Wo wänn diä au e artgrächts Büro für dr Eric Wäber här biko
Dr Luschtmolch Prinz Andrew hebt si Schnäpper nit in Schach
Drum het dä grusig Siech au mit sim Mami Krach
Dr Prinz Charles isch jo do drgäge rächt guet use ko
D Queen het ihn halt statt am Schnäpper an de Ohre gno
Mit däm Bangg do zeige mir euch jetzt emol ganz offe
Schwätze do grad alli a – öb nüechtern oder bsoffe
Öb masculin, öb feminin oder gschlächtsneutral
Öb a-, bi- oder tetrasexuell, das isch egal
Öb homo oder hetero oder polygam
Öb wissi, grüeni oder schwarzi, öb wild oder ganz zahm
Transgender, nit binär, oder ganz gschlächtslos
Öb digg, dünn, öb quadratisch, öb chlii oder au gross
Öb fruchtbar, chinderlos, villicht sogar kastriert
Öb gwaaggst, e Glatze oder au völlig unrasiert
Öb Zeugen Jehova, reformiert oder au katholisch
E Freigeischt, übersinnlich oder diabolisch
Bisch du wüescht wiä d Nacht, denn isch es halt eso
Oder duesch villicht sogar vo Züri ko
Das alles isch egal und macht wirklich nüt
Dr David Däge suecht imfall dringend neui Lüt