Fasnacht 2023
D Gletscher schmelze immer schnäller und gän Sache frei
E Flugiwrack zum Byspiil und Ötzis sin`s scho drei
Jetz het me schyyns grad letschti zimmlig wyt dört unte
No e paar akläbti Klimaaggtivischte gfunde
Füülsch di unbruuchbar und bisch nit wiirgligg schlau
Im Dschobb laufts zimlig schitter und rächt het nur di Frau
Denn könne mir dir hälfe us däm Loch uuse z koo
Will vor luter Mangel wirsch au du als Lehrer gno
D Gläisgummi die halte nit, was me sich verspricht
Gheit doch letschti grad so e Wellöler voll uf s Gsicht
E poröse Gummi muesch schnäll uswäggsle loo
Em Putin sini Mamme hät besser au e Nöie gno
D Gletscher schmelze wyter und führe kunnt no meh
Was me do alles finde duet in däm Yys und Schnee
Mit eme IQ vo 50 het me- wenn me`s duet ufrunde-
E sältens Exemplar vome «gscheite» Ziircher gfunde
In dr Freie haut mi doch no so e Bättler aa
Froogt mi eb y ihm ächtscht nit e Batze haa
Y schigg en schimpfend furt und mergg denn aber glyy
Das isch so ain vom OK vom Schwingfescht Prattele gsi
D Gletscher schmelze witer und hän unseri Neugiir gweggt
Schliesslig het me wiider öppis Speziells entdeggt
Jetz ligge ganz witt unte, me hets z erscht fascht nit gsee
Doch wiirgglig no drei Pünggt vo unserem FCB
D`Regierig hets befoole, drum halte mir uns draa
Stroomspaare isch agseit mir löön käi Lampe aa
Au d Häizig die bliibt kalt und zum warm bikoo
Wird bi uns am Oobe e unkielts Cüpli gno
In dr Nacht druggt d’Bloose, me sett uf s Hüüsli go
Mit mim Daameryschli duen i schwanggend voorwäärts koo
Blind tascht y mi witter und füül mi do drbii
Öppe wie dr Odermatt - nit dä uf de Schii
Zwäi Schritt links, eine rächts und no witer füüre
Schloo mir denn dr Kopf aa will y lauf voll in e Düüre
Mi Orientierigssinn isch wäg y füül mi richtig gfange
So ischs dängg au em Berset uf sim Franggriich-Irrfluug gange
Drümmlig drääi mi um dramp die nöggschti Düüre ii
Dummerwiis ischs d Wohnig vo mim Nochber gsi
Irgendwenn ha y das WC im Dunggle doch no bräicht
Und am Morge aber gmerggt – y ha in Wöschkorb iine gsäicht